Riqanın VEF mədəniyyət sarayında və Liepayanın “Lielais Dzintars” konsert zalında həmyerlimiz Ülvi Əzizovun uğuru

2020-ci ilin ilk günlərində Latviyada “Etoile Ballet Gala” layihəsi  (direktor Olqa Əzizova)  çərçivəsində   Riqanın VEF mədəniyyət sarayında və  Liepayanın “Lielais Dzintars” konsert zalında  Çaykovskinin əfsanəvi “Şelkunçik”  baleti  göstərilib.   Moskvanın “Klassik balet” teatrının artistlərinin iştirakilə keçən bu tamaşalarda baş rolları Andreya Mota və  həmyerlimiz Ülvi Əzizov ifa ediblər. Hər iki tamaşa auditoriya tərəfindən böyük  rəğbət, gur alqışlarla qarşılanıb. 

Ülvi Əzizov (1985) Bakı Xoreoqrafiya Məktəbinin məzunudur. O, habelə Türkiyədə də   balet ustası kimi təkmilləşib. Dünya şöhrətli  Yuri Qriqoroviçin təşkil etdiyi “Dünyanın gənc baleti”  müsabiqəsində (2006) xüsusi mükafata layiq görüldükdən sonra Ü.Əzizovun beynəlxalq karyerası vüsət almağa başlayıb. Tanınmış balet ustası V.Pisarev onu “Dünya  baletinin ulduzları” qala-konsertində iştirak etmək üçün dəvət edib.  Ü.Əzizov  Fransa, İtaliya, Yunanıstan, Rusiya, Ukrayna, Finlandiya, Çexiya, Almaniya və başqa ölkələrin balet teatrlarında  böyük uğurla çıxış edir. 2009-cu ildə R.Nureyev adına  XVI Beynəlxalq balet festivalında  Ü.Əzizov “Balet sənətinin inkişafına verdiyi töhfələr və yüksək professional sənətkarlığa görə” mükafatı ilə təltif olunub.  O, “Don Kixot”, “Bayaderka”, “Korsar”, “Jizel”, “Yatmış gözəl”, “Qu gölü”  və s.  klassik  balet tamaşalarında  parlaq obrazlar yaradıb. Latviya baletsevərləri də Ü.Əzizovu yaxşı tanıyırlar. Onun Latviyanın balet səhnələrində  müntəzəm  olaraq  müxtəlif tamaşa və qala-konsertlərdə çıxışı  bir qayda olaraq müvəffəqiyyətlə keçir və mütəxəssislər tərəfindən yüksək qiymətləndirilir.